ලොරියාගේ පොලිස් පාර්ට් සහ රෙද්ද අස්සේ පොටෝ කැචර්

'සෙංකෝලයෝ ....සෙංකෝලයෝ'...

දෙවට ඉස්මත්තේ ඉඳන් ගමටම ඇහෙන්න කබියා බෙරිහන් දෙනවා.....

තාත්තා ඇහැරුණොත් වසල හමාරයි.. හොඳ දේශනයක් අහගන්න ඇහැකි හවස් වරුවම. හීං සීරුවේ බාගෙට ඇරුණු පිළිකන්නේ දොරෙන් එළියට පැනගත්ත මං උක්කුං මාමලගේ අන්නහි වත්තේ වැටේ කම්බි පොට පාත් කරලා දෙවැටට සේන්දු වුණේ 'යකෝ ගමටම ඇහෙන්න බෙරිහන් දෙන්න එපා බං. ගෙදරින් පැනගන්න තියන චාන්ස් එකත් නැතුව යනවා' කියමින්.


'සෙංකෝලයා උඹ හෙට මොනවත් වැඩක් දාගනද' ?

'නෑ ඇයි' 

'හෙට ලොරියා ගානේ පාටියක්.... අපි ට කැලිඩෝ යන්න එන්න කියලා ඌ කිව්වා.ලෑස්ති වෙලා හිටපන් උදේම යනවා'

'ලොරියා ගානේ පාටියක් ඒ මොකට ද' ?...

'ලොරි මූණා පොලිසියට තේරිලා..... ඉරිදා හවස ඌ යනවා කුණ්ඩසාලේ පුහුණුවට. ඒකයි පාටිය'

'නියමයිනේ. කවුද වෙන යන්නේ'

'උඹ, මම, රෙමා,පඬියා,පඩික්කලයා,අලයා මෙහෙන් යනවා.....ලොරියත් එක්ක වෙනම වාහනේ එනවා තකුඳයි, පිජ්ජමැස්සයි'

ඒකත් ජය සිරි මංගලං කිව්වලු. ගෙදරට දාහක් බොරු ගහල සෙනසුරාදා කැලිඩෝ යන්න දාගත්තේ ඔන්න ඔහොමයි.
කතිකා කරගත්තු විදියටම අපි සැට් එක කළුතරදි තමා එකට එකතු වුණේ. ලොරියගේ අයියා; තකුඳා යාළුවෙකුගෙන් ඉල්ලගන තිබුණු වෑන් කට්ටකින් තමා කළුතරට ආවේ. වෙනද වගේ නෙමේ ලොරියා හිටියේ බොහොම සතුටකින් කියන එක පෙනෙන්න තිබුණා. ගමෙන් අපි වෙන වෙනම ආවට කළුතරදී අපි සේරම අර වෑන් එකේ තමයි කැලිඩෝ ගියේ. අවශ්‍ය කළමනා සේරම ගත්තේ තකුඳා. වෙනදා රුපියල් 100 එළියට අදින්න අදි මදි කරන එකා අද ඕසෙට වියදම් කරනවා. මල්ලිට රස්සාවක් සෙට් වෙච්ච එක ගැන ඌ හිටියෙත් බොහොම සතුටින්.

'අඩෝ තකුවා මට වයිට් එකක් ගනිං බං මං අනිත්වා බොන්නේ නැ' පිජ්ජා නාහෙන් අඬනවා.

අපි කැලිඩෝ වෙරළට යන විටත් පෙම්වතුන් තමන්ට සෙටමෝල් වෙන්න තැන් හොයා ගෙන. සමහරු පැලපදියං වෙන්න තැන් හොයමින් ඇවිදිනවා. ආදරේ කොරනකොට ඔය ගල් දෙකක් අස්ස තරම් සැප වෙන තැනක් තියනවයෑ ඉතින්. ඒකනේ කුඩේකුත් අරං උදෙන්ම සෙට් වෙන්න එන්නේ. අපිවගේ නස්කූනියො කාණ්ඩත් දෙක තුනක් ම තැන් තැන්වල වෙනම ආතල්වල. 

ඒ අතරේ කෛරාටික සාත්තර කාරයොයි, වෙළෙන්දොයි ඇහැ ගහගන ඉන්නේ ජෝඩු රිංගන තැන් මොනවද කියලා. දෙකක් අනුමත වෙන ගමන් මේව බලමින් අපි ගත්තේ වෙනම ආතල් එකක්.

ඔන්න ගල් අස්සට ගිය ජෝඩුවක් කෙල්ලට අයිස්ක්‍රීම් කන්න දෙන්න පටන් ගන්න හදනකොටම වගේ අර සාත්තර කාරයෝ රිංගනවා එතැන්ට. අනේ ඉතිං මේ කැනහිලාගෙන් අයිස් පලම් එක වහං කොර ගන්න නං ඉතිං විගහිං කියක් හරි දීලම එලෝ ගන්න ඕනනේ. එදා අපිට පෙනුණු හැටියට නං ජෝඩුවකට කිසිම සැපක් ගන්න මේ වෙළෙන්දොයි සාත්තර කාරයොයි ඉඩ දුන්නෙම නෑ.

වෙනදා මේව දැක්කම ළග පිකප් වෙන ලොරියා එදා මාර සීරියස්. හරියට මේකා දැන් රගපාන්නේ පොලිසියේ රස්සාව කරන එකෙක් වගේ.

'මේව මහ අපරාධ බං කොහොම හරි මේ කෙල්ලො කොල්ලෝ මේ ගල් අස්සට එන එක නවත්තන්න ඕන'

'අනේ පලයං බං ලොරියො බොරු සුචරිතයා නොවී. උඹ ඒ දවස්වල පියසේනයල ගේ ගෙදර වැලේ වනලා තිබුණු අනෝමගේ ජංගිය උස්සන්න ගිය එකානේ'

වෙනදනං මේ කතාව මතක් කොරනකොට මාරයා ආවේශ වෙන ලොරියාගේ එදා හැසිරීම හිතාගන්නත් අමාරුයි. 

'අපි වැරදි කළා බං දැන් ඒව ගැන මං පසු තැවෙනවා'

'මෙන්න මෙන්න සර්ව සාධාරණ පොලිස් කාරයෙක්' 

ඔන්න ඔය අතරේ වැල්ලේ එහා කෙළවරට වෙන්න අමුතු යමක් වෙන බව පෙන්නුවේ කබියා.කැමරාවක් අටෝගත්තු පොරක් කෙල්ලෙක්ගේ පිංතුර ගන්නවා. අනේ වයසක අම්මණ්ඩි කෙනෙක් ඇදුං මල්ලකුත් එල්ලං සාරි පොටින් ඔළුව වහගෙන පැත්තකට වෙලා ඉන්නවා. කැමරා කාරයා කෙල්ලව එහෙං ඉන්දනවා මෙහෙං ඉන්දනවා ගන්න පොටෝ එකක් නං නෑ. අර අම්මන්ඩිය පැත්තකට යවනවා. මේකා මූද අයිනේ පිංතුර ගන්න ආවට පිංතුර ගන්නම ගොඩ බිම පැත්ත. ගල් උඩ කෙල්ලව ඉන්දනවා අර කෙල්ලගේ අම්මව ටිකක් ඈතට කොරනවා. මේකා පොටෝ ගන්නවට වැඩිය කරන්නේ අර කෙල්ලව හදන එක. ඔන්න දැන් වැඩේ තේරුණා කට්ටියට.

'ලොරියො බලපංකෝ බං අරු පොටෝ ගන්නවට වැඩිය අර පොඩි කෙල්ලගේ රෙද්ද අස්සේ අත දාන එකනේ කොරන්නේ. අර ගොං අම්මණ්ඩිටත් ඒක තේරෙන්නේ නෑ. දාපං කෝ ගිහින් පොලිස් පාර්ට් එකක්. පුරුදු වෙන්නත් එක්කම' පඬියා ලොරියව ෆෝම් කරනවා.

ඔන්න දැන් අපේ සැට් එක ටික ටික අර අම්ම ළගට කිට්ටු වුණා.

'ආ ඇන්ටී පොටෝ ගන්න ඇවිත් වගේ'....

'මේ අපේ කෙල්ලව ටැලිවිසොං නාට්ටියක රගපාන්න ගන්න මහත්තයා කෙනෙක් ඇවිත්. නාට්ටියට ගන්න කලිං පොටෝ අල්ලලා බලන්න ඕනලු'

'ඉතිං ඇන්ටි මේ තරම් වෙරළ ඉඩ තියෙද්දි ඔය පොටෝ අල්ලන්න කෙල්ලව ගල් අස්සේ රිංගන්නේ මොකද? ඒ මහත්තයා'

'අනේ ළමයෝ කිව්වම මොකද මං ඕක ඇහුවම ඒ මහත්තයා කිව්වේ පොටෝ ගන්නකොට ඉස්සරහිං බලපුවාම කෙල්ලගේ මූණ වෙනස් වෙනවලු. ඒකයි ඔය කවුරුවත් කෙල්ලගේ ඉස්සරහින් පේන්නේ නැති තැන්වල තියලා පොටෝ අල්ලන්නේ'

ඔන්න ලොරියට මල පැන්නා...

'මාර අම්මල තමා.. ඔහේට පේන්නේ නෑ අරකා පොටෝ ගන්නවට වඩා කෙල්ලගේ ගවුම අස්සෙ අත දාගන. මාරාවේශ වූ ලොරියා අර ගෑනිගේ අතින් ඇදගෙන ගියා ගල අස්සේ කෙල්ල ඉන්දලා හිටපු තැනට. අඩෝ මහත්තයෝ උඹ පොටෝ ගන්නේ කෙල්ලන්ගේ කලව අස්සේ අත දාගන ද? බැහැපිය බල්ල එළියට....කෙල්ලේ තෝ පල මේ අම්මත් එක්ක ගෙදර...
තෝ දැන් පොලිසි ගෙනියන්න ද..... නැත්තං මේ කෙල්ලගේ නම්බුව තියල මෙතැනින් මාරුවෙනව ද' ?

අපි හිතුවෙවත් නැති විදියට ලොරියා රගපෑම වෙනස් කළා..

'යන්නං........යන්නං සර්' ....... කියමින් අරූ මාරු වුණේ ගලක් උඩ ඌ තියලා තිබ්බ පොටෝ අල්ලන්න ගෙනාව ත්‍රිපාදකයකුත් අමතක කරල දාලයි.

දැන් කෙල්ල රතු වෙලා.. අම්මා පිං දෙනවා ලොරියට. මං ඔහේලව පොලිසි නොගෙනිච්චේ මේ කෙල්ලගේ ආත්ම ගෞරවය ගැන හිතලා. හ්ම් දැන් යන්න පුළුවන් දෙන්නටම.. 

අනේ අර අම්මණ්ඩි දොහොත් මුදුන් දී ලොරියට ආචාර කොරලා තමයි යන්න ගියේ.

මේ ට්‍රයිපෝඩ් එක මගේ සිහිවටනයක් කියමින් ලොරියා ඒක අතට ගත්තා. මේ තමා මගේ පොලිස් රස්සාවේ අමතකම නොවන සිහිවටනය.

පොලිස් ට්‍රේනින් යන්න කලින් ඔන්න ඔහොමයි ලොරියා පොලිස් කාරයෙක් වුණේ.

ප.ලි..
අදටත් ලොරියා නැගෙනහිර පළාතේ ඉතා ගෞරවාන්විත පොලිස් සේවයක නිරතවෙයි...ඒ වගේම සහෝදරියන් දියණියන් සිටින අය මේ ගැන දෙවරක් හිතන්න